David Beckham mbush sot 50 vjeç. Një gjysmë shekulli jetë për një njeri që ka qenë shumë më tepër sesa futbollist i jashtëzakonshëm. Ka qenë një ikonë globale, përzierje e rrallë mes talentit në fushë, elegancës jashtë saj dhe popullaritetit që ka tejkaluar kufijtë e sportit.
Nëse dikush mund të përfaqësojë epokën e “futbollit glamour”, ai është Beckham. Me pamje gjithmonë të kuruar deri në detaj, qasje metroseksuale, i martuar me Victoria Adams, ish-anëtare e “Spice Girls”, i pranishëm në eventet më prestigjioze, ai arriti të ndërtonte një imazh unik, pa e kompromentuar profesionalizmin në fushën e blertë.
Megjithatë, Beckham nuk ishte vetëm imazh. Në fushë, ishte mjeshtër i krosimeve dhe goditjeve të dënimit, një nga më të mirët e brezit të tij. Me Manchester United fitoi gjithçka në epokën e artë të Fergusonit, më pas spikati edhe te Real Madridi “galacticos” krahas emrave si Zidane, Figo dhe Ronaldo.
Karriera e tij përfshiu gjithashtu PSG-në, Milanin dhe eksperiencën në MLS me LA Galaxy, përpara se të themelonte Inter Miami, një projekt ambicioz që sot përfshin edhe Leo Messin dhe do të marrë pjesë në Botërorin e Klubeve.
Nga Manchesteri në Madrid, nga Parisi në Milano e deri në Los Angeles dhe Miami, Beckham ka jetuar si në filma. Dhe kudo që ka shkuar, ka lënë gjurmë. Jashtë fushës është përshkruar si një baba shembullor, ndonëse jeta e tij në qendër të vëmendjes ka sjellë edhe ndonjë skandal.
Në fund të fundit, anglezi mbetet një figurë që ka fituar simpatinë e shumë njerëzve jo vetëm për talentin e tij, por për mënyrën e të qenit. Sot, teksa mbush 50 vjeç, nuk ka vend për zili, por vetëm admirimin e një karriere brilante. Gëzuar ditëlindjen, David Beckham, legjendë brenda dhe jashtë fushës së blertë!
