Shqipëria vazhdon të mbetet edhe këtë të premte nën dominimin e masave ajrore të qëndrueshme, duke sjellë mot të kthjellët dhe temperatura të larta, të cilat pritet të regjistrohen në zonat Qëndrore dhe Jugore të vendit.
Kthjellimet do të mbizotërojnë deri në mesditë, por pasdite pritet zhvillimi i vranësirave në skajin Verilindor dhe Juglindor, ku ka mundësi për rrebeshe shiu dhe breshër në disa zona të izoluara. Parashikohet që pas orëve të vona të mbrëmjes, kushtet atmosferike të përmirësohen dukshëm në të gjithë territorin.
Temperaturat e ajrit do të regjistrojnë një rritje, duke u luhatur mes ekstremëve, nga 7°C si vlera më e ulët në Pukë, deri në 31°C, e cila pritet të shënohet në qarqet e Elbasanit dhe Beratit.
Era do të fryjë e lehtë në tokë dhe me shpejtësi mesatare në det, duke arritur deri në 45 km/h nga drejtimi Veriperëndimor, duke krijuar dallgëzim mbi 2 ballë në brigjet detare.
