Një video ku shfaqet një person i cili dyshohet se është autori i vrasjes së 58-vjeçarit Renato Hoxha pak ditë më parë në Vlorë.
Në pamje duket një person me kapuç i cili largohet nga rrugica ku u krye edhe ekzekutimi i viktimës.
Vrasësi ishte i pajisur me një maskë silikoni që i mbulonte të gjithë fytyrën, kishte vendosur një bark artificial, si dhe kishte mbajtur maskë AntiCovid dhe kapele për të fshehur çdo detaj të identitetit të tij.
Mëngjesin e të mërkurës, për këtë ngjarje të rëndë u arrestua një person, i cili dyshohet të ketë bashkëpunuar në këtë vrasje.
Bëhet fjalë për shtetasin Erlis Mehmeti, i cili sipas burimeve policore dyshohet se ka vënë në dispozicion të vrasësit, automjetin e tij.
Në përpjekje për të humbur gjurmët, automjetit të Mehmetit i ishin vendosur një palë targa të tjera të vjedhura.
Në momentin e ndalimit, policia i ka sekuestruar Mehmetit edhe aparatin celular ky dyshohet se mund te ketë biseda me autoret e dyshuar.
Sakaq, burimet policore bëjnë me dije se kanë edhe një person të dyshuar si autor i vrasjes së Renato Hoxhajt, por që dyshohet se pas krimit të jetë larguar drejt Greqisë.
Është pikërisht ky personi që shfaqet në video, duke u larguar pas vrasjes.
Ndonëse ende nuk ka një pistë zyrtare të deklaruar, burimet pranë grupit të hetimit shprehen se motivet e ekzekutimit të 58-vjeçarit kanë të bëjnë me ngjarje të mëparshme kriminale në qytetin e Vlorës ku i ndjeri dyshohet që mund të ketë luajtur rolin e informatorit mes grupeve rivale kriminale.
Dhe për këtë arsye dyshimet janë që vrasja e tij mund të jetë porositur nga jashtë vendit.
Gjithsesi arrestimi i një prej bashkëpunëtorëve të dyshuar pritet që të përforcojnë më shumë pistat e ngritura të cilat duket se po çojnë në zbardhjen e kësaj vrasjeje, e cila në momente e para dukej sikur ishte kryer pa lënë gjurmë.
