Gjatë një debati me gazetarin Isa Myzyraj në emisionin “Off the Record” të Andrea Dangllit në A2 CNN, kandidatja e Primareve të Partisë Demokratike për Elbasanin, Alesia Balliu e cila u përjashtua nga gara e 11 majit dhe më pas u largua nga selia blu, bëri publike disa mesazhe kërcënuese që pretendon se i janë dërguar përmes WhatsApp.
Sipas Balliut, një prej kërcënimeve ka ardhur nga nipi i Drejtuesit Politik të PD për Shkodrën, Luçiano Boçi, i cili më parë ka qenë deputet i Elbasanit.
“Më kanë kërcënuar individë të ndryshëm të PD. Pa diskutim që kanë emra dhe do t’i them te institucionet përkatëse. I kam çuar dhe do merren. E ke numrin e telefonit këtu, një mesazh personal e ke këtu. Dhe i kam thënë mos guxo të më shkruash më se do t’iu çoj në Prokurori”, u shpreh Balliu, pasi gazetari Myzyraj i kërkoi të përmendte emra konkretë.
Ajo më pas tregoi për kamerat një nga mesazhet që pretendon se ka marrë: “Po ta dish që ke hap i lojë që se përballon dot. Mbaje mend kte fjalen time. Elbasani është i vogël o Alesia”, mesazh që, sipas saj, është dërguar nga numri personal i nipit të Luçiano Boçit.
“Nipi i Luçiano Boçit nga numri i vetë personal. Këto janë mesazhet, kjo është arsyeja përse i dola kundër unë kësaj partie o zotëri. Këto i kam rezervuar në media për të mirën e asaj partie. Këtu i ke me numër telefoni. Mund t’i çosh edhe vetë në Prokurori”, iu drejtua Balliu gazetarit Myzyraj.
“Mesazhet, faktet flasin më shumë se fjalët tuaja. Unë nuk mund të heshtja. Kur ata donin që unë të heshtja me dhunë dhe çfarëdolloj metode për të kërcënuar një femër që kishte luftuar dhe kishte dhënë shpirtin për këtë parti, kjo është e turpshme. Dhe nuk e toleroj kur dikush do të më bëjë presion, të më mbylli gojën kur kërkoj të drejtën time.”
