Numri i viktimave nga shpërthimi në portin më të madh tregtar të Iranit ka arritur në 40, ndërsa mbi 1,000 persona të tjerë janë plagosur, sipas përditësimeve më të fundit nga mediat shtetërore.
“Deri më tani, 40 persona kanë humbur jetën si pasojë e shpërthimit,” deklaroi Mohammad Assouri, një zyrtar lokal në provincën Hormozgan, ku ndodhet porti Shahid Rajaee. Shpërthimi shkaktoi dëme të mëdha në ndërtesa dhe automjete, ndërkohë që banorët raportuan se vala e goditjes u ndje deri në 50 kilometra larg vendngjarjes.
Flakët u përhapën me shpejtësi në kontejnerët që përmbanin materiale të ndezshme, duke shkaktuar disa vatra të mëdha zjarri. Pamjet ajrore tregonin tre zjarre jashtë kontrollit. Ministri i Brendshëm i Iranit konfirmoi se zjarri kaloi nga një kontejner në tjetrin, çka çoi në mbylljen e institucioneve publike të dielën.
Sipas kompanisë private Ambrey Intelligence, zjarri dyshohet se është shkaktuar nga trajtimi i gabuar i një ngarkese me lëndë djegëse të ngurtë, të përdorura për raketa. E njëjta kompani kujton se në mars të vitit 2025, një anije iraniane kishte shkarkuar në këtë port një ngarkesë me perklorat natriumi, një substancë e njohur për përdorimin e saj në prodhimin e karburantit për raketa.
