Partia Demokratike ka reaguar zyrtarisht lidhur me lajmet që kanë qarkulluar në media për një kontratë lobimi pranë institucioneve amerikane, e cila kap vlerën e rreth 6 milionë eurove.
Në një deklaratë për shtyp, PD sqaron se kjo iniciativë synon forcimin e bashkëpunimit me Shtetet e Bashkuara të Amerikës në funksion të rikthimit të demokracisë dhe shtetit të së drejtës në Shqipëri. Sipas PD-së, kjo nismë është ndërmarrë nga fondacioni “Make Albania Great Again”, me mbështetjen e komunitetit shqiptaro-amerikan.
Reagimi i plotë i PD:
“Komuniteti shqiptaro-amerikan, përmes fondacionit “Make Albania Great Again”, ka kontraktuar kompaninë “Continental” për të ndihmuar në konsolidimin e marrëdhënieve miqësore të Partisë Demokratike, si forca më e madhe opozitare, me Kongresin dhe Qeverinë e SHBA-së. Synimi i bashkëatdhetarëve tanë në SHBA është bashkëpunimi i PD-së me aleatin kryesor të Shqipërisë, për të rivendosur demokracinë funksionale dhe shtetin e së drejtës në Shqipëri.
Kompania “Continental” drejtohet nga Ambasadori Carlos Trujillo, i cili njihet gjithashtu si avokat i Presidentit Trump dhe si antikomunist i palëkundur në qëndrimet e tij.
Kontributi financiar për realizimin e këtij qëllimi është marrë përsipër 100% nga patriotë shqiptarë që jetojnë dhe punojnë prej dekadash në SHBA, si dhe nga demokratë të tjerë të larguar nga Shqipëria gjatë këtyre 10 viteve për shkak të regjimit të Edi Ramës.
Partia Demokratike, duke falënderuar demokratët antikomunistë të komunitetit shqiptaro-amerikan për bujarinë dhe patriotizmin e tyre, sqaron opinionin publik se, ndonëse ka dhënë dakordësinë për marrjen e këtij shërbimi në përputhje të plotë me ligjet e të dy vendeve, nuk ka asnjë barrë financiare apo detyrim kontraktual që lind nga kjo marrëveshje.”
