Kryetari i Partisë “Mundësia”, Agron Shehaj, ka bërë një deklaratë të fortë para ambienteve të Kryeministrisë, ku ka zbuluar detaje të reja lidhur me dosjen për arrestimin e kryetarit të Partisë së Lirisë, Ilir Meta. Ai tha se kjo dosje përmban emrat e disa pushtetarëve të tjerë që, sipas tij, kanë abuzuar me pushtetin në Shqipëri.
Shehaj theksoi se emri i kryeministrit Edi Rama është gjithashtu i përfshirë në këtë dokument, duke nënkuptuar se shumë nga ministrat dhe oligarkët e lidhur me të kanë keqpërdorur burimet e shtetit për përfitime personale. Ai akuzoi qeverinë se ka marrë vendime ligjore që kanë favorizuar oligarkët në vend të qytetarëve shqiptarë.
“Qytetarët shqiptarë duan fundin e pandëshkueshmërisë dhe kjo mund të ndodhë vetëm nëse Edi Rama përballet me drejtësinë. Kjo është dosja në bazë të së cilës është arrestuar Ilir Meta. Në këto dhoma, janë marrë vendime sesi të bëheshin ligjet jo në favor të qytetarëve, por në favor të oligarkëve,” u shpreh Shehaj.
Shiko videon këtu!
