Hansi Flick vlerësoi se si po mbërrin skuadra e tij në ndeshjen e së martës kundër Mallorca. Trajneri gjerman la të kuptohet se Ferran Torres do të zëvendësojë Robert Lewandowskin, i cili është i dëmtuar, dhe lëshoi një paralajmërim të lehtë ndaj futbollistëve që u zemëruan për mungesën e minutave kundër Celta Vigos. Më i mërzituri nga të gjithë ishte Ansu Fati, që nuk u aktivizua.
Ndeshja kundër Mallorca: “Mendoj se Mallorca po bën një kampionat të mirë dhe ka mundësinë të luajë në Europë sezonin e ardhshëm. Do të jetë një ndeshje e vështirë, është një skuadër me përvojë, që mbrohet mirë dhe shumë e fortë në tranzicion… Duhet të jemi të përgatitur”.
Gjendja e Lewandowski: “Shpresoj që të jetë gati për ndeshjet vendimtare. Duhet të presim, nuk e dimë se kur do të kthehet dhe sa do të mungojë. Preferoj të mos them më shumë”.
Ter Stegen: “Ai është gati, afër rikthimit. Do të flas me të. Do të vendosim kur është momenti më i mirë për të luajtur sërish”.
Ankesat për oraret e ndeshjeve: “Nuk ka të reja, kam thënë çfarë doja të thoja. Nuk kam asgjë për të shtuar”.
Futbollistët e pakënaqur: “E kuptoj që lojtarët nuk janë të kënaqur dhe ndihen të palumtur kur nuk luajnë. Kam qenë vetë futbollist profesionist dhe i kuptoj. Të gjithë duan të tregojnë që mund të japin kontribut dhe të jenë pjesë e ekipit. E kuptoj këtë, por nuk e kuptoj reagimin. Është një situatë që duhet ta pranosh. Bëmë një përmbysje të madhe ndaj Celta Vigos, pasi ishim në disavantazh. Dhe morëm vendimet e duhura. Duam të shohim reagim të mirë nga lojtarët, jo atë që ndodhi pas ndeshjes së fundit. Të gjithë duhet ta festojnë fitoren. Më pëlqen të shoh reagimin e futbollistëve kur luajnë”.
Fundi i La Liga-s: “Nuk e di çfarë do të ndodhë. Kundër Celta Vigos vuajtëm; edhe Real Madridi vuajti kundër Athletic. La Liga është shumë konkurruese, shpresoj të mos humbasim asnjë pikë, por duhet të luajmë fort. Nëse nuk i bëjmë gjërat mirë, si kundër Celta…, rrezikojmë shumë. Pra, duhet të përmirësohemi. Shpresoj që kjo ndeshje të ketë shërbyer si sinjal për t’i korrigjuar dhe përmirësuar gjërat që duhen për të ecur në drejtimin e duhur. Rruga është e gjatë, ka ende shumë për të bërë. Real Madridi është një skuadër fantastike dhe do të synojë gjithashtu të arrijë objektivat e vet”.
Dy javë vendimtare: “Gjëja më e rëndësishme për mua është që të përqendrohemi te vetja jonë. Duhet të përmirësohemi në çdo ndeshje. Kemi cilësinë për të mposhtur këdo, por vetëm nëse i bëjmë gjërat siç duhet. Pas ndeshjes me Celta Vigo, me atë përmbysje, ndiej shumë energji positive. Kjo më pëlqen shumë. Skuadra është në një moment të mirë, duhet të vazhdojmë kështu”.
Lodhja fizike: “Duhet ta menaxhojmë lodhjen, është shumë e rëndësishme t’i kemi këmbët e freskëta. Duhet ta menaxhojmë minutazhin e secilit futbollist. Nuk është e lehtë për t’u menaxhuar, sepse lojtarët duan të tregojnë që janë në formë dhe nuk duan të pushojnë, por ata duhet të pranojnë vendimet tona. Ne duam të marrim vendimet më të drejta për skuadrën”.
Finalja e Kupës dhe La Liga: “Nuk besoj se finalja do të ndikojë. E dimë që janë dy kompeticione të ndryshme. Objektivi ynë është të fitojmë, edhe i Real Madridit gjithashtu. Pas finales së Kupës së Mbretit do të mbeten ende shumë ndeshje për t’u luajtur”.
Ferran Torres: “Është në një moment të mirë të karrierës së tij. Ka shënuar 10 gola në La Liga. Pozicioni i tij është si sulmues i parë, ka lëvizshmëri, ndihmon në mbrojtje… Është në formë optimale, por duhet ta menaxhojmë mirë sepse kemi nevojë për të deri në fund të sezonit”.
Raphinha: “Duhet theksuar se i gjithë grupi i lojtarëve është shumë profesionist. Kam një skuadër që gjithmonë fokusohet te gjërat për t’u përmirësuar. Raphinha dhe shumë të tjerë bëjnë një punë fantastike. Janë liderë. Jam shumë i kënaqur me skuadrën, me atë që lojtarët bëjnë në fushë dhe me mënyrën se si përgatiten për ndeshjen tjetër”.
Pozicioni i Frenkie de Jong: “I analizojmë ndeshjet dhe i tregojmë se si duhet të luajë. Ndonjëherë, kur ke topin, askush nuk mendon që mund ta humbasë…, por duhet të jesh në gjendje ta rifitosh kur e humbet. Kishte disa situata kundër Celta Vigos që nuk më pëlqyen”.
