Behtjar Bajraktari, i njohur si DJ Crax, është liruar pas një qëndrimi tre mujor në burg. Ai ishte arrestuar për shkak të një sherri masiv në një klub nate në Pejë, ku u dhunua keq personazhi i njohur i rrjetit social TikTok, Medi Iseni dhe një i afërm i tij.
Crax, DJ i reperit Rigels Rajku, më të njohur si Noizy, u akuzua se kishte “gisht” në dhunimin e Medit dhe një miku të tij. Pas disa muajsh në burg, ai u dërgua në Kosovë për zhvillimin e procesit gjyqësor, ku u vendos dhe liria e tij.
Arrestimi i tij erdhi pas incidentit të dhunshëm në klub, i cili tronditi opinionin publik. Në të njëjtën kohë, Noizy ishte arrestuar gjithashtu afër Shëngjinit, teksa po udhëtonte për në një koncert. Ai u lirua pas një garancie prej 50 milion lekësh të vjetra, duke u rikthyer shpejt në aktivitetet e tij muzikore.
Ndërkohë, Arkimed Lushaj, i njohur si Stresi, vazhdon të jetë në kërkim nga policia, pasi prej muajsh është “zhdukur” për t’i shmangur arrestimit. Ai ka anuluar koncertet dhe nuk ka dhënë shenja publike.
Medi Iseni ka akuzuar Stresin se e ka “pre në besë”, duke e ftuar në të njëjtin vend ku ndodhej dhe Noizy me grupin e tij, duke ndihmuar në ndodhitë e dhunshme që pasuan. Ky rast po hetohet nga autoritetet dhe po vazhdon të ngjallë reagime të shumta në opinionin publik.
