Ashtu siç edhe pritej, Inter vuajti shumë në transfertë ndaj Bologna-s, ndeshje e vlefshme për javën e 33-të në Serie A. Në sfidën e luajtur në “Renato Dall’Ara”, Bologna fitoi 1-0 falë një goli të Riccardo Orsolini-t në minutën e fundit shtesë.
Një ndeshje pa shumë raste, tek zikaltrit ndikoi normalisht dhe lodhja në mesjavë në Champions ndaj Bayern Munich. Kristjan Asllani e pa ndeshjen nga stoli, elbasanasi nuk u preferua për asnjë minutë nga Simone Inzaghi.
Kur pritej vërshëllima e arbitrit, pas një rivënie anësore dhe gabimit të Bisseck i cili nuk largon topin në mënyrën e duhur, Riccardo Orsolini dërgon topin në rrjetë me një goditje gjysëm rroveshatë. SHIKOGOLIN6
Festë e madhe në “Renato Dall’Ara”. Bologna merr tre pikë të arta dhe tani ngjitet në vendin e katërt me 60 pikë, 1 pikë më shumë se Juventus i vendit të pestë, i cili luan nesër.
Kur mbeten dhe 5 javë nga fundi, gara për titullin në Serie A do jetë më e fortë se kurrë, Inter dhe Napoli tashmë janë me pikë të barabarta me nga 71 pikë.
