Bukayo Saka pësoi një dëmtim në kyçin e këmbës gjatë fitores 4-0 të Arsenalit ndaj Ipswich, por trajneri Mikel Arteta ka qetësuar tifozët duke thënë se gjendja e tij “nuk është asgjë serioze”.
Sulmuesi anësor anglez u godit ashpër në pjesën e pasme të kyçit nga Leif Davis në minutën e 32-të – një faull që solli edhe kartonin e kuq për mbrojtësin. Saka u zëvendësua në pjesën e dytë dhe u pa më pas me fashim në këmbë.
Arteta konfirmoi se Saka “ndjente shqetësim”, por theksoi se zëvendësimi ishte masë parandaluese, duke pasur parasysh ndeshjen e parë të gjysmëfinales së Champions League kundër Paris Saint-Germain më 29 prill.
“Ai ndjente pak shqetësim, por nuk është diçka serioze, ndaj jemi të qetë,” tha Arteta.
“Nuk kam parë pamjen me ngadalësim, vetëm atë në kohë reale. E godet nga mbrapa, dhe edhe pse nuk besoj se ishte me qëllim, është i rrezikshëm sepse Saka nuk ka mundësi të reagojë – nuk e sheh që po vjen.”
