Sulmuesi i Barcelonës, Robert Lewandowski, pritet të mungojë të paktën tre javë për shkak të një dëmtimi në muskujt e pasmë të kofshës, të cilin e pësoi gjatë ndeshjes së së shtunës në La Liga ndaj Celta Vigos.
Lewandowski ka qenë në super formë këtë sezon 2024-25, duke shënuar 40 gola dhe regjistruar 3 asistime në 48 paraqitje me katalanasit.
Megjithatë, 36-vjeçari u largua i dëmtuar nga fusha në minutat e fundit të ndeshjes, të cilën Barcelona e fitoi 4-3 pasi rikuperoi disavantazhin 3-1.
Klubi konfirmoi zyrtarisht dëmtimin të dielën, dhe sipas “AS”, sulmuesi pritet të mungojë për të paktën tre javë.
“Testet e kryera të dielën kanë konfirmuar se lojtari i ekipit të parë Robert Lewandowski ka një dëmtim në semitendinosusin e këmbës së majtë. Kthimi i tij në fushë do të varet nga progresi në rikuperim,” thuhet në deklaratën e Barcelonës.
Një mungesë prej tre javësh do ta mbante jashtë fushës të paktën deri më 10 maj, që do të thotë se Lewandowski do të humbiste pesë ndeshje të rëndësishme për Barcelonën, përfshirë finalen e Kupës së Mbretit ndaj Real Madridit fundjavën e ardhshme, si dhe të dy përballjet gjysmëfinale të Ligës së Kampioneve ndaj Interit.
Ndeshjet që Lewandowski rrezikon të humbasë:
- Barcelona – Mallorca (23 prill)
- El Clasico – Finalja e Kupës së Mbretit ndaj Real Madrid (26 prill)
- Barcelona – Inter (gjysmëfinale, vajtje – 30 prill)
- Barcelona – Valladolid (La Liga – 3 maj)
- Inter – Barcelona (gjysmëfinale, 6 maj)
Nëse mungesa e tij konfirmohet për tërë këtë periudhë, Lewandowski mund të rikthehet më 11 maj në përballjen ndaj Real Madridit në La Liga, një ndeshje që mund të jetë vendimtare për titullin kampion.
Kush mund ta zëvendësojë Lewandowskin?
Ferran Torres ka qenë në formë të mirë këtë sezon, me 17 gola dhe 4 asistime në 40 ndeshje në të gjitha kompeticionet, dhe pritet të jetë zgjedhja e parë si sulmues qendror në mungesë të polakut.
Në krahë do të luajnë Raphinha dhe Lamine Yamal, ndërsa Gavi, Dani Olmo dhe Fermin Lopez do të garojnë për rolin e mesfushorit ofensiv.
Lewandowski ka rinovuar kontratën për edhe një sezon, deri në fund të sezonit 2025-26, dhe mbetet opsioni i parë i Barcelonës në sulm edhe për vitin e ardhshëm.
