Mijëra shqiptarë që jetojnë dhe punojnë në Greqi janë kthyer në vendlindje për të festuar Pashkët pranë familjeve të tyre.
Në pikën kufitare të Kapshticës, në 72 orët e fundit janë numëruar mbi 20 mijë shtetas shqiptarë që janë kthyer në atdhe, ndërsa mbi 8 mijë të tjerë kanë dalë drejt Greqisë.
Pavarësisht fluksit të lartë të lëvizjeve, situata në pikën kufitare të Kapshticës paraqitet e qetë, pa radhë apo vonesa në përpunimin e dokumenteve.
Autoritetet kufitare bëjnë me dije se aktualisht po punohet me 5 sportele, për të menaxhuar fluksin dhe për të garantuar një shërbim sa më të shpejtë për qytetarët.
Në vijim, pritet që lëvizjet të mbeten të larta edhe në ditët pas festës, me kthimin e emigrantëve drejt vendeve ku jetojnë dhe punojnë.
E njëjta situatë është paraqitur edhe në pikën kufitare të Qafë-Thanës. Gjatë 48 orëve të fundit, në këtë pikë kufitare kanë hyrë dhe dalë më shumë se 16 mijë shtetas shqiptarë dhe të huaj.
