Kryebashkiaku i Ourense, një qytet spanjoll me 100 mijë banorë, i quajtur Gonzalo Perez Jacome, ka krijuar një bujë të madhe negative me një deklaratë të fundit raciste.
Pas dështimit të Real Madridit në çerekfinalet e Champions League kundër Arsenalit, Jacome ka bërë një reagim të turpshëm në rrjetin social “X”. Sipas tij, Ancelotti gaboi duke u mbështetur te lojtarët me ngjyrë.
“Real Madrid ka menduar se, duke nënshkruar me shumë lojtarë me ngjyrë, do të ishte më dominues në fushë. Kjo do të thotë të mos kesh asnjë ide për futbollin apo atletikën”, ka shkruar kryebashkiaku.
Ai u është referuar yjeve si Vinicius Junior, Rodrygo Goes, Aurelien Tchouameni, Eduardo Camavinga, Jude Bellingham, Kylian Mbappe dhe Antonio Rudiger.
Deklarata e tij nuk është pritur aspak mirë. “Si dreqin të kanë votuar ty?!” – shkruajnë qytetarët spanjollë në postimin që është bërë viral prej dy ditësh.
