Ditën e sotme u mbajt seanca e radhës e dosjes “Plumbi i artë” me dëshminë e të penduarit të drejtësisë, Nuredin Dumani.
Seanca u ndërpre për shkak të tensioneve dhe debateve mes të pandehurve dhe bashkëpunëtorit të drejtësisë, në lidhje me disa detaje të ngjarjeve të rënda kriminale.
I penduari i drejtësisë u përplas me ish-shokun e tij, Henrik Hoxhaj, person me të cilin shoqërohej edhe ditën kur Dumanit i bënë atentat e përfundoi pas hekurave, për të rrëfyer krimet e 12 viteve të fundit.
Bashkëpunëtori i drejtësisë, Nuredin Dumani foli edhe për atentatin ndaj Lulzim Mashës i cili mbeti në tentativë.
Për Henrik Hoxhajn, kjo dëshmi ishte kontradiktore, pasi sipas tij porosia ishte marrë për asgjësimin e djalit të Lulzim Mashës.
E në mënyrë që të arrinin tek i biri, ata planifikuan t’i vrisnin të atin që djali të merrte pjesë në ceremoninë mortore të babait për ta ekzekutuar aty.
Nuredin Dumani: Porosinë për Lulzim Mashën ma ka dhënë Suel Çela. Më tha, që e ka për persona të tjerë. Përveç Çelës për këtë vrasje kam folur me Aleksandër Bahon. Kontaktin me Suel Çelën ma ka dhënë Fatmir Troplini.
Avokati: Pse e more porosinë e Suelit?
Nuredin Dumani: Për interes. Fillimisht për 150 mijë euro e pastaj për 200.
Avokati: Të ka treguar Baho si njihej me Suel Çelën?
Nuredin Dumani: Jo. Sueli nuk më ka treguar ndonjëherë për arsyen e kësaj porosie. Kur i tregova Henrikut, më tha që e njoh (Lulzim Mashën) dhe që është plak i mbaruar. Punën ja dhashë Henrikut. I kam dhënë disa mjete për këtë punë, një golf 4, dy armë, një “uzi” pistol dhe një pistoletë 19 mm.
Henrik Hoxhaj: E ndërrove porosinë, ishte për djalin e tij. Arsyeja pse, ishte se djali ishte në Maqedoni. Informacionet për hyrje – daljet e tij janë marrë nga “Sakati” (Aleksandër Baho). Shuma ishte 150 mijë euro. Kur djali do vinte, kishte 200 mijë euro me vete. Lekët që do merreshin do ishin ekstra. Kemi pritur gati 1 vit për ta bërë. Në mungesë të djalit ishim të detyruar të vrisnim babain që të vinte në varrim.
Avokati: A të ka kërkuar Aleksandër Baho të vrasësh Lulzim Mashën për llogari të personave të tjerë?
Nuredin Dumani: Jo. Më ka kërkuar që të mos them se kemi kontakt bashkë.
Avokati: Ti ke deklaruar se të ka kërkuar Aleksandër Baho që të vrisje Lulzim Mashën.
Nuredin Dumani: Suel Çela do të bëjë një punë më ne më tha. Ma tha Aleksandër Baho kur ka ardhur në Kosovë. Nuk i kam folur Suel Çelës për Henrik Hoxhaj. Në dijeninë time Sueli me Henrikun nuk kanë folur, por fshehtas, po. Në momentin që u plagosa unë, kanë folur bashkë. Kam pasur dy telefona, Sueli e hoqi Matrix, pas vrasjes së Bled Muçës.
