Një mjek 40-vjeçar nga Berlini, i identifikuar si Johannes M., është në qendër të një prej skandaleve më tronditëse në historinë moderne të mjekësisë gjermane, pas akuzave për vrasjen e 15 pacientëve të tij përmes administrimit të qëllimshëm të medikamenteve vdekjeprurëse.
Sipas prokurorëve gjermanë, mjeku dyshohet se ka vepruar i shtyrë nga një “epsh për vrasje”, pa ndonjë përfitim financiar apo motiv tjetër tradicional. Ky rast ka hapur një debat të gjerë në Gjermani mbi mbikëqyrjen e profesionistëve të shëndetit dhe sigurinë e pacientëve.
Hetimet kanë zbuluar se viktimat – 12 gra dhe 3 burra, të moshave 25 deri në 94 vjeç – kanë ndërruar jetë midis shtatorit 2021 dhe korrikut 2024. Autoritetet dyshojnë se mjeku u ka injektuar atyre një koktej medikamentesh, përfshirë anestezikë dhe relaksues muskujsh, të cilët shkaktojnë paralizë të muskujve të frymëmarrjes, duke çuar në vdekje brenda pak minutash.
Një nga episodet më tronditëse ka ndodhur më 8 korrik 2024, kur ai dyshohet se vrau dy pacientë në të njëjtën ditë: një burrë 75-vjeçar në lagjen Kreuzberg në mëngjes dhe një 76-vjeçare në lagjen Neukölln pasdite. Pasi nuk arriti të shkaktonte zjarrin në banesën e viktimës së dytë, ai kontaktoi të afërmit, duke u shtirur si i shqetësuar për mungesën e përgjigjes.
Një ekip special hetuesish ka analizuar mbi 395 raste të dyshimta, ku mjeku ka pasur kontakt me pacientë që më pas kanë ndërruar jetë në rrethana të pazakonta.
