GJKKO lë në fuqi arrestin me burg për Ilir Metën.
U mbyll në orën 17:30 seanca për vlerësimin e masës së sigurisë ndaj Ish presidentit të Republikës, aktualisht kryetari i Partisë së Lirisë, Ilir Meta, Monika Kryemadhit, Piro Xhixhos dhe Ema Çokut dhe tashmë gjykata ka dhënë vendimin.
Në gjyq Meta preferoi të mbrohej vetë, dhe të mos linte avokatin të fliste, ndërsa akuza përfaqësohej nga 3 prokurorë: Altin Dumani, Arben Kraja dhe Sotir Kllapi.
Gjyqtari Erjon Çela pasi dëgjoi pretendimet e vetë Metës u tërhoq për të marrë vendim.
SPAK arrestoi më 21 tetor 2024 kreun e Partisë Ilir Meta, nën akuzë për korrupsion, pastrim parash dhe fshehje të pasurisë. Të njëjtat akuza rëndojnë edhe ndaj Monika Kryemadhit.
Ndaj Piro Xhixhos, babai i Erisa Xhixhos, rëndon akuza korrupsion pasiv. Sipas SPAK ai dyshohet se ka shfrytëzuar autoritetin e tij si Kryetari i AKEP-it, ku u propozua nga LSI-ja, dhe në zbatim të porosive të marra nga Meta dhe Kryemadhi ka ndikuar tek drejtuesit e kompanisë telefonike celulare për finalizmin e marrëveshjes, si dhe ka lejuar kompaninë private të ushtrojë aktivitetin e saj në shkelje të ligjit të AKEP. Ai u la në detyrim paraqutje.
Ndërsa ndaj Ema Çokut rëndon akuza e pastrimit të parave. Çifti Meta-Kryemadhi akuzohen se ndër vite kanë ushtruar pushtetin e tyre për të përfituar pasuri në mënyrë të paligjshme dhe kanë fshehur burimin e tyre duke përdorur edhe familjarët. 2 dosjet ndaj Metës, Cez-Dia dhe lobimi në SHBA janë bashkuar tashmë në 1 hetim.
