Pronarët e bizneseve që zhvillojnë aktivitetin përgjatë bregut të liqenit në qytetin e Pogradecit, janë mbledhur ditën e sotme për të kundërshtuar vendimin për vendosjen e impjanteve të përpunimit të ujërave të zeza dhe atyre të përdorura.
Pronarët e lokaleve dhe resorteve që shërbejnë për akomodimin e turistëve, pretendojnë se nuk duhet të përfshihen në aktin normative, për aq kohë sa impianti që ka aktualisht në përdorim Pogradeci, përballon dyfishin e kapacitetit që ka sot zona.
Blerja e këtyre impianteve kushton nga 20 deri në 100 mijë euro, shumë e cila me sa duket nuk mund të përballohet nga këta sipërmarrës. Sipas operatorëve, akti normative që i detyron të kenë impantet e përpunimit të ujërave të zeza dhe të përdorura, përfshin edhe bizneset e vogla që kanë aktivitet vetëm gjatë verës.
Të bashkuar ata thanë se nuk do t’i blenë impiantet, dhe nëse presioni do të vazhdojë ata do të mbyllin plotësisht bizneset e tyre. Operatorët nënshkruan një peticion që ja nisën kryeministri, kryetares së parlamentit dhe ministrisë së turizmit.
Nga ana tjetër derdhja e ujërave të papërpunuara në liqen, dëmton florën dhe faunën dhe rrezikon që Liqeni i Pogradecit të humbasë statusin që ka nga UNESCO si atraksion botëror.
