Në një lëvizje befasuese, Tim Stockley, themeluesi i OnlyFans, ka paraqitur një ofertë të papritur për të blerë TikTok, mes presionit të administratës Trump për të detyruar largimin e platformës nga kompania kineze ByteDance. Sipas një raporti të Reuters, propozimi u dorëzua përmes startup-it të tij të ri, Zoop, në bashkëpunim me kompaninë e kriptomonedhës The Hbar Foundation.
Megjithëse detajet e ofertës nuk janë bërë publike, Zoop e ka përshkruar këtë lëvizje si një “përballje David kundër Goliathit”, që synon të sjellë një revolucion në mbështetje të krijuesve të përmbajtjes. Ndërkohë, Amazon gjithashtu ka hyrë në garë, duke dorëzuar një propozim marrjeje të mërkurën përmes një letre drejtuar zëvendëspresidentit të SHBA, J.D. Vance, dhe Sekretarit të Tregtisë, Howard Latnick, sipas New York Times. Një burim e ka konfirmuar ekzistencën e ofertës për Independent, megjithatë Amazon nuk ka komentuar lidhur me këtë çështje.
Sipas burimeve ndërkombëtare, negociatat duket se nuk po e marrin seriozisht propozimin e Zoop. Amazon dhe kompanitë e tjera të mëdha mbeten favoritët, pasi qeveria amerikane po përgatitet të marrë vendime të rëndësishme për të ardhmen e platformës. Afati për paraqitjen e propozimeve, i vendosur nga Presidenti Trump, skadon të shtunën, më 5 prill, pas një urdhri ekzekutiv që ai nënshkroi në ditën e tij të parë në Shtëpinë e Bardhë, duke dhënë 75 ditë për të vendosur për fatin e TikTok. Gjykata e Lartë kishte mbështetur më parë ligjin që kërkon ndarjen e TikTok nga ByteDance ose ndalimin e tij në SHBA, duke e argumentuar këtë me arsye sigurie kombëtare. Investitorë të mëdhenj, si Blackstone dhe Oracle, janë tashmë të përfshirë në negociatat për aplikacionin popullor.
