Dy shqiptarë rrezikojnë secili një dënim me burg me 30 muaj dhe një gjobë prej 12 mijë euro, pasi u kapën duke transportuar 1 kg kokainë. Siç raportohet ngjarja ka ndodhur më 28 shkurt të këtij viti, kur një patrullë e policisë së Rajonit të Limburgut kontrolloi makinën e dy shqiptarëve.
“Automjeti i tyre ishte me shpejtësi 160 kilometra në orë dhe ndërronin vazhdimisht korsi”, tha prokurori i Tongeren. Ai tha se kur u kontrolluan, të dy dukeshin nervozë.
Gjithashtu oficerët gjetën një qese me 1 kilogram kokainë nën një nga sediljet e makinës. Ndërkohë 54-vjeçar pranoi se ishte drogë, por shoferi 38-vjeçar mohoi të dinte se kishte kokainë në makinë.
“E takova në një kafene dhe ai më kërkoi të shkoja me të, pasi nuk mund të drejtonte makinën. Nëse do ta dija se kishte drogë në makinë, nuk do ta kisha bërë kurrë këtë”, i tha gjykatësit 38-vjeçari.
Prokurori i Tongerenit nuk e besoi atë histori dhe kërkon dënim me burg prej 30 muajsh dhe 12 mijë euro gjobë.
“Ata janë pjesë e një organizate të transportit të drogës. Këto janë fakte serioze”, tha ai.
