Një grua tentoi t’i japë fund jetës së saj ditën e sotme në qëndër të qytetit të Durrësit, por ishin qytetarët ata që fatmirësisht ndërhynë dhe parandaluan ngjarjen e rëndë.
58-vjeçarja me inicialet F. G., ishte e ulur në stolat që ndodhen afër bashkisë kur në një moment i vendosi flakën vetës. Qytetarët ndërhynë menjëherë dhe ndaluan atë që nisi të bëjë zonja, e cila fatkeqsisht nuk shpëtoi pa lëndime trupore.
Ajo u dërgua me urgjencë në Reaminacionin e Durrësit, ku pasi mori mjekimin e nevojshmë, tregoi dhe arsyet që e shtynë drejt këtij vendimi, shkruan Iliria News.
Sipas asaj që është transmetuar, gruaja ka treguar se disa muaj më parë kishte marrë një kredi, dhe tashmë nuk kishte mundësi që ta paguante. Përmbaruesit i kishin kërkuar që ta paguante, duke i thënë se në rast se nuk do të shlyente detyrimin, ata do ta dërgonin çështjen në gjykatë dhe do t’i bllokonin pensionin.
“Kam kërkuar ndihmë kudo, më bëjnë presion për një kredi, ka 6-7 muaj. Më morën nga mikrokredia që ta paguaja, ose paguaje ose do të çojmë në gjykatë dhe të heqim pensionin.
Po më detyroni të bëj një veprim që s’dua ta bëj, u thashë. Shkova një javë rresht te banka. Më mori një djalë i thashë s’kam mundësi ta paguaj, s’më intereson më tha. Kam borxhe të tjera, qira, kredi.
Kisha për të paguar 200 mijë lekë, për ilaçe e bukë më duheshin se bënin 250 mijë lekë ilaçet. 90 mijë lekë pension, nuk na del, jam me qira. I kam 600 mijë lekë edhe pronarit.
Ndaj dogja veten, më thanë që më kanë çuar në gjykatë. 1 milion pata marrë. Këtu bashkia s’na jep asgjë, pse na përçmojnë ne”, thotë zonja.
Gruaja tashmë po mbahet në kujdesin e mjekëvve, por ajo u bë viktima e radhës e mikrokredive në Shqipëri. Kujtojmë se disa muaj më parë 63-vjeçari Pal Trashaj i dha fund jetës duke konsumuar fosttoksinë përpara ambienteve të SPAK.
Pak ditë pas kësaj ngjarje edhe Olsi Ibro, drejtuesi i institucionit financiar MCA që jepte kredi për qytetarët, i dha fund jetës duke u hedhur nga lartësia e një pallati në Tiranë, në rrethana misterioze.
Ndërhyrja e Bankës së Shqipërisë në rregullimin e tregut të kredive dhe shtimi i kontrolleve nga institucionet përgjegjëse mund të jenë disa masa që nëse vendosen të merren, do të parandalojnë ikjen e jetëve të tjera në të ardhmen.
