Zhurma e serialit “Adolescence” që është bërë sensacion në mbarë botë, i quajtur “Adolescence” ka prekur edhe kryeministrin Edi Rama
Në një takim me prindërit teksa ishte në shkollën “Besnik Sykja” në Tiranë, ai u sugjeroi atyre që të shohin serialin “Adolescence”
Madje Rama tha se do ishte mirë që filmi të shfaqej edhe në shkolla pasi tregon ekzaktësisht sfidat për shoqërinë sot sa i përket fëmijëve.
“Duke qenë se jam një tifoz po them, nuk e di si quhet, por faktikisht jam shumë i dhënë pas kinemasë dhe do ju sugjeroja të gjithëve ju që jeni këtu dhe ata që më dëgjojnë të shikoni një film që ka dalë së fundmi që quhet “Adoleshenca” dhe do t’ju sugjeroja që ta ndani me sa më shumë të tjerë. Do ishte shumë mirë nëse do mund të bënim shfaqje të filmit për nxënësit në të gjitha shkollat. Mund të përdorim palestrat për të bërë shfaqje të organizuara sepse është një film i cili ka tronditur mbarë botën dhe flet ekzaktësisht se për çfarë sfidash bëhet fjalë për ne sot dhe sesa larg jemi ne edhe kur na duket se në fakt jemi afër dhe sa pak kuptojmë ne kur na duket sikur në fakt kuptojmë shumë nga fëmijët tanë”, tha Rama.
Sipas tij, sot familjet jetojnë në dy universe ku fëmijët kanë të tyrin dhe është shumë e vështirë për prindërit që ta kuptojnë se çfarë bëjnë ata në rrjetet sociale. Prandaj, për kreun e qeverisë mbyllja e TikTok ka qenë hapi i duhur pavarësisht vështirësive.
“Për fat të keq jetojmë në dy universe paralele, ata hyjnë e dalin në universin tonë, kurse ne nuk kemi akses në universin e tyre dhe në universin e tyre zhvillohen situata dhe ngjarje që ne as nuk kemi idenë dhe për fat të keq, kur diçka nga ato zhvillime aty del në mexhelis në formën e një ngjarje shumë të rëndë atëherë tronditemi të gjithë, por ajo që ndodh është se në fakt është çdo minutë, çdo minutë. Prandaj besoj shumë që mbyllja e TikTok nuk është se ka zgjidhur gjithë këtë problematikë, por ama ka qenë hapi i duhur dhe unë i falënderoj të gjithë mësuesit dhe prindërit, 95% e tyre na kanë inkurajuar që ta hedhim këtë hap. Nuk ka qenë një hap i lehtë, ne nuk jemi as Amerika, as Britania, ne jemi një vend i vogël dhe TikTok është sa shumë shtete si ne të bëra bashkë, por besoj që kemi bërë gjënë e duhur dhe kemi bërë detyrën”, tha Rama.
“Adoleshenca” është një mini-serial britanik ku në qendër është një nxënës 13-vjeçar. Ai arrestohet për vrasjen e një shoqeje klase. Hetimet dhe intervistat me psikologen zbuluan se personazhi kryesor i këtij seriali ishte bullizuar në mënyrë të vazhdueshme në rrjetet sociale. Nga ana tjetër familja e tij duhet të përballet me komunitetin teksa përpiqen të marrin veten nga arrestimi i djalit të tyre.
Edhe kryeministri i Britanisë së Madhe, Keir Starmer ka mbështetur një lëvizje për ta shfaqur “Adoleshencën” në shkolla.
