Kryetari i Partisë Demokratike, Sali Berisha, ka paraqitur pasditen e sotme programin për transformimin e sektorit të sportit në Shqipëri, duke garantuar një riorganizim të thellë të infrastrukturës ligjore dhe organizative.
Ai theksoi se sporti do të çlirohet nga ndikimi i asaj që e quan “mafia qeveritare”, e cila, sipas tij, ka pasur një rol të dëmshëm, duke favorizuar klube të caktuara dhe duke shkaktuar padrejtësi në garat sportive. Berisha gjithashtu njoftoi dyfishimin e buxhetit për sportin dhe një strategji të re për garantimin e burimeve financiare transparente dhe investimeve nëpërmjet sponsorizimeve të sektorëve privat dhe shtetëror. Ai theksoi se ligji do të garantojë mundësi të barabarta për të gjitha klubet dhe do të luftojë fenomenin e shitjeve dhe blerjeve të paligjshme në sport.
Sali Berisha: Me këtë program garantohet një riorganizim, një transformim tërësor i infrastrukturës ligjore, organizative të këtij sektori jashtëzakonisht të rëndësishëm për një vend dhe një shoqëri, siç është sporti. Në programin që ka hartuar departamenti i sportit, strategjia e sportit kombëtar është një strategji me të cilën së pari sporti çlirohet nga mafia qeveritare, e cila në çdo diktaturë është një pseudoaleat i sportit.
Kur them unë këtë, vjen nga ana e dheut pse është vëllai i kryeministrit, merr klubin dhe vendos pabarazi absolute me klubet e tjera. Për meritën e vetme se mafia qeveritare përfaqësohet me vëllain e kryeministrit. Sporti do të ketë ligjin e vet, në të cilin do garantohen me ligj të gjitha burimet financiare transparente, të pastërta.
Të gjitha investimet, sponsorizimet e sektorit privat dhe shtetëror me inkurajim të madh nëpërmjet të ligjit të sponsorizimit, të angazhimit të biznesit në mbështetje. Krahas kësaj, buxheti për sportin do të dyfishohet.
Shanset e barabarta në raport me shtetin të klubeve, janë të domosdoshme për një garë të ndershme, fisnike të tyre brenda vendit dhe jashtë. Mafia qeveritare në sport është problematike edhe në pazaret që bëhen pas perdeve në ato që quhen shitje dhe blerje. Ligji do u japë përgjigjen më të rreptë./ilirianews.al
