Një 26-vjeçar është nxjerrë nga rrënojat në kryeqytetin Naypyidaw të Mianmarit, pesë ditë pasi vendi u godit nga një tërmet shkatërrues me magnitudë 7.7 ballë.
Ekipet e shpëtimit vendas dhe turk e gjetën burrin, Naing Lin Tun, dhe konstatuan se ai ishte ende gjallë duke përdorur një kamerë endoskopike, shkruajnë mediat e huaja.
Më pas ata bënë një vrimë nëpër rrënojat e hotelit ku ai punonte dhe e sollën jashtë të mërkurën në mëngjes, pothuajse 108 orë pasi “u varros”.
Operacioni i shpëtimit zgjati më shumë se nëntë orë, sipas MRTV-së shtetërore.
Pesë ditë pas tërmetit vdekjeprurës, shpresat për gjetjen e të mbijetuarve të tjerë po shuhen, me ekipet e shpëtimit të penguara nga lufta civile e vazhdueshme në vend, si dhe nga dëmet e rënda që tërmeti ka shkaktuar në rrugë dhe ura.
MRTV raportoi të mërkurën se numri i të vdekurve në Mianmar është rritur në 2,886, me 4,639 të tjerë të lënduar.
Në Tajlandën fqinje, e cila gjithashtu u prek, autoritetet thanë se kishin gjetur vdekejen të paktën 22 persona.
Numri i të vdekurve në Mianmar pritet të rritet mbi 3,000 të mërkurën, tha Min Aung Hlaing, shefi i juntës që mori pushtetin në një grusht shteti ushtarak në vitin 2021.
Grupet humanitare kanë bërë thirrje për një armëpushim midis ushtrisë dhe grupeve të ndryshme të armatosura etnike për të lehtësuar dërgimin e ndihmave.
Edhe pse disa grupe rebele kanë shpallur armëpushime të njëanshme, raportet raportojnë se junta është ende duke nisur sulmet në zonat e dëmtuara nga tërmeti.
Tom Andrews, raportuesi special i OKB-së për të drejtat e njeriut në Mianmar, tha se sulmet ushtarake duhet të ndalen.
“Fokusi në Mianmar duhet të jetë në shpëtimin e jetëve, jo në marrjen e tyre”, ka bërë thirrje ai.
Tërmeti i së premtes ka përkeqësuar një krizë tashmë të rëndë humanitare në Mianmar.
Edhe para katastrofës, gati 20 milionë njerëz kishin nevojë për ndihmë humanitare, sipas Kombeve të Bashkuara. /
