Kryetarja partisë së ekstremit të djathtë në Francë, Marine Le Pen, ka reaguar për herë të parë si u shpall fajtore për përvetësim të fondeve të BE, duke iu ndaluar po ashtu edhe kandidimi për poste publike për pesë vite.
Në një intervistë për mediat franceze, Le Pen ka deklaruar se është e pafajshme, duke akuzuar gjykatën për marrjen e një “vendimi politik”.
Teksa u pyet gjithashtu se pse u largua nga gjykata para se të dëgjonte gjyqtarin të jepte dënimin, ajo tha: “nuk kishte nevojë të rrija më shumë pasi e kuptova se çfarë po ndodhte”.
“Gjykata kërkoi të më bllokonte qëllimisht nga kandidimi në vitin 2027”, shton ajo, duke iu referuar zgjedhjeve të ardhshme presidenciale të planifikuara në Francë. “Miliona njerëz në Francë do të privohen nga votimi për favoritin në zgjedhjet e ardhshme”, thotë ajo.
Më tej Le Pen tha se është e skandalizuar dhe e indinjuar nga vendimi ndaj saj, por jo e demoralizuar, pasi sipas saj, në një demokraci janë votuesit ata që vendosin.
“Po ju them sonte, nuk jam e demoralizuar. Si ju, jam e skandalizuar, e indinjuar, por kjo indinjatë, kjo ndjenjë e padrejtësisë, është një shtysë shtesë në luftën që unë luftoj për ata, votuesit”, thotë ajo.
Ajo shton se nuk do të heqë dorë ende dhe do të ndjekë një proces apelimi sa më fortë të mundet. Megjithatë, ajo shton se nuk ka besim që apelimi i saj të shqyrtohet përpara se vendi të shkojë në qendrat e votimit.
“Të jemi të qartë, unë jam eliminuar, por në realitet janë miliona francezë, zërat e të cilëve janë eliminuar”, shton ajo.
Nëse ajo e rrëzon me sukses vendimin në kohë, ajo tha se do të kandidojë për presidente edhe pse apelimet në vend mund të zgjasin me muaj apo edhe vite.
