Mjeku i njohur ortoped Niko Durri është ndarë papritur nga jeta në moshën 54-vjeçare në Durrës, njoftonin sot kolegët e tij të Urdhrit të Mjekut Durrës.
Dr. Niko ishte një figurë e rëndësishme e shërbimit të Ortopedisë-Traumatologjisë në Spitalin Rajonal të Durrësit prej vitesh, ndërsa ka ndërruar jetë në mënyrë të papritur për shkaqe ende të paditura.
Në njoftimin e lajmit i shprehen ngushëllimet familjarëve dhe kolegëve si dhe listohen meritat e punës së mjekut ortoped, të ndarë nga jeta në mënyrë të parakohshme e të pashpjeguar.
Postimi i plotë:
Me dhimbje të thellë mësuam lajmin e hidhur të ndarjes nga jeta të Doktor Niko Durri, në moshën 54 vjeçare.Një humbje e parakohshme për familjen dhe bluzat e bardha.
Dr. Niko, një figurë e rëndësishme e shërbimit të Ortopedisë-Traumatologjisë në Spitalin Rajonal të Durrësit dhe një shembull i përkushtimit të palodhur ne shërbim të pacientëve, sot nuk është më mes nesh.
Dr. Niko Durri, u lind në vitin 1971 ne Tiranë. Ai përfundoi studimet e larta në Fakultetin e Ai Mjekësisë të Universitetit të Tiranes ne vitin 1997 si Mjek i Përgjithshëm, duke e përfunduar me rezultate të shkëlqyera. Më pas kreu specializimin për Ortopedi -Traumatologji ne Universitetin e Mjekesise”Carol Davilla”, në Bukuresht të Rumanisë.
Pas specializimit punoi për një periudhë një vjeçare si mjek ortoped-traumatolog në spitalin e Beratit deri në vitin 2005 dhe më pas në spitalin e Lushnjes për një vit tjetër deri në vitin 2006.
Me pas emërohet në Spitalin e Durrësit si mjek ortoped-traumatolog, ku vazhdonte të ushtronte profesionin.
Doktor Niko Durri gjatë gjithë karrierës së tij tregoi profesionalizëm, kulturë, korrektësi, qytetari dhe vlera e virtyte humane që konfiguruan tek secili mjekun e besuar dhe shumë të dashur për çdo pacient.
