Menjëherë pas ndeshjeve kombëtare janë shkaktuar problemet e para për Bayernin e Mynihut, i cili ka humbur dy futbollistë.
Klubi bën të ditur se Davies dhe Upamecano do të mungojnë në përballjet e Champions ndaj Interit, dhe pritet të ndikojnë jo pak në skuadër.
Francezi do të jetë jashtë për disa javë, ndërsa sa i përket Davies, situata është edhe më alarmante, pasi kanadezi e ka mbyllur sezonin para kohe.
Kanadezi ka pësuar këputje të ligamentit, ndërsa një goditje e tillë pritet ta lërë larg fushave të paktën për rreth 6 muaj.
Në duelin ndaj SHBA-ve, Davies braktisi fushën në minutën e 12-të, ku i bëri të ditur mjekëve të përfaqësueses se e kishte të pamundur të vijonte.
Sa i përket lojtarit tjetër, Upamecano, ai luajti titullar ndaj Kroacisë, madje shënoi penalltinë vendimtare që kualifikoi gjelat në gjysmëfinalet e Nations League.
Duket se pas ndeshjes, shtatlarti ka ndjerë shqetësime, dhe ai do të humbasë të dyja ndeshjet përballë Interit në Champions. Kujtojmë që edhe në edicionet e shkuara, në këtë fazë të kampionatit, Bayern ka shfaqur situata të tilla me futbollistët.
