Presidentja e Kosovës, Vjosa Osmani ka reaguar për pretendimet e presidentit Vuçiç se marrëveshja e bashkëpunimit mes Shqipërisë, Kosovës dhe Kroacisë është kërcënim ndaj Serbisë.
Osmani tha se Beogradi po bën propagandë dhe po gënjen pasi marrëveshja e mbrojtjes nuk ka asnjë qëllim tjetër përveç shkëmbimit të eksperiencave dhe përmirësimit të aftësive të mbrojtjes të secilit vend.
“Serbia si shtet që nuk beson në ato vlera, por që i sulmon vazhdimisht, del me propagandë se kinse qenka shkelur një marrëveshje e vitit 1996. Por, kushdo që e lexon atë marrëveshje, e vëren një gjë, që Serbia po e bën të njëjtën që e ka bërë gjithmonë, pra po gënjen, sepse nuk ka asnjë të vërtetë në atë që e kanë thënë dhe s’ka asnjë rrezik për ta. Ekziston veç një burim destabiliteti në rajon, e ajo është Serbia”, tha Osmani.
Osman u pyet edhe nëse do të kandidojë për një tjetër mandat presidencial.
“Gjatë gjithë karrierës sime politike, kam punuar gjithmonë duke pasur parasysh interesin e Kosovës dhe qytetarëve të saj. Asnjëherë, asnjë vendim imi politik nuk është bazuar në kalkulime për atë se ku do të jem unë, por vetëm se ku do të jetë Kosova dhe qytetarët e saj”, tha Presidentja.
Posti i presidentit pritet të jetë në qendër të diskutimeve të subjekteve politike në Kosovë, për të arritur në një marrëveshje për formimin e qeverisë së re. Mandati i Vjosa Osmanit mbaron në muajin prill të vitit të ardhshëm.
