Kreu i Grupit Parlamentar të Partisë Demokratike, Gazment Bardhi, ka drejtuar akuza të rënda drejt Partisë Socialiste për manipulime dhe presione elektorale në qarkun e Fierit. Në një postim në Facebook, Bardhi deklaroi se “banda elektorale e Belinda Ballukut” po përpiqet të ndikojë zgjedhjet me fondet e korrupsionit, por sipas tij, qytetarët e Fierit nuk do të nënshtrohen.
Në qendër të akuzave të tij ishte Blendian Dalipaj, një emër që Bardhi e lidh me “bandat elektorale të PS-së” dhe që sipas tij, po vepron në prapaskenë për të organizuar krime zgjedhore.
“Bledian Dalipaj, një nga anëtarët më të zëshëm të bandës elektorale të PS në qarkun Fier, mund të fshihet përkohësisht pas numrit spanjoll për të dhënë porosi për krime elektorale ndaj vartësve dhe punonjësve të administratës, por e garantoj se për Partinë Demokratike ai është Mr. 944, dhe rrugën e ka të shtruar për atje ku e ka çdo bandit,” – shkruan Bardhi, duke ndarë një prej denoncimeve të emisionit “Vetting” në News24, lidhur me marrjen e një tenderi nga babai i Dalipajt.
Duke kërkuar veprime konkrete nga Prokuroria e Posaçme (SPAK), ai theksoi se strategjia për goditjen e krimeve zgjedhore nuk duhet të mbetet vetëm në letër.
“Fieri është 24 orë një skemë krimi elektoral!” – paralajmëroi ai, duke i bërë thirrje SPAK-ut të tregojë nëse është vërtet i vendosur për të ndaluar manipulimin e zgjedhjeve apo nëse po shërben si një mekanizëm propagande për të fshehur korrupsionin e qeverisë.
