Disa njerëz sëmuren më shpesh për shkak të faktorëve të ndryshëm si mungesa e gjumit, stresi, sëmundjet kronike dhe mjedisi ku jetojnë.
Sipas mjekut Nikhil Bhayani, të rriturit sëmuren mesatarisht dy deri në tre herë në vit, por mungesa e orëve të gjumit mund të rrisë ndjeshëm gjasat e sëmundjes. Njerëzit që flenë më pak se gjashtë orë kanë katër herë më shumë mundësi për të ftohur.
Stresi gjithashtu ndikon negativisht në sistemin imunitar, duke dobësuar aftësinë e trupit për të luftuar mikrobet. Sipas klinikës Cleveland, stresi kronik dobëson sistemin mbrojtës, duke e bërë më të lehtë për mikrobet të shkaktojnë infeksione. Gjithashtu, sëmundjet kronike si artriti reumatoid, diabeti i tipit 1 dhe koliti mund të ndikojnë negativisht në imunitet.
Mjedisi luan një rol të madh në shëndet. Qëndrimi në vende ku mikrobet përhapen lehtë, si transporti publik apo supermarkete, rrit mundësinë e infeksioneve. Po ashtu, prindërit kanë më shumë gjasa të sëmuren për shkak të fëmijëve që frekuentojnë shkollat apo kopshtet, të cilët shpesh bartin viruse.
Dieta e varfër është një tjetër faktor kyç. Vitaminat C, D dhe E dhe mineralet si zinku dhe seleni janë thelbësore për imunitetin. Mungesa e një regjimi ushqimor të shëndetshëm mund të rrisë shanset për t’u prekur nga sëmundjet. Konsumimi i frutave, perimeve dhe drithërave të pasura me këto elementë forcon sistemin mbrojtës të trupit.
Për të përmirësuar sistemin imunitar, është e rëndësishme të bëni ndryshime në stilin e jetesës. Ushtrimi i përditshëm, larja e duarve shpesh dhe gjumi i mjaftueshëm janë disa nga masat që mund të ndihmojnë. Ushtrimet përmirësojnë qarkullimin e qelizave të bardha të gjakut dhe largojnë mikrobet nga mushkëritë, ndërsa larja e rregullt e duarve ul rrezikun për infeksione deri në 20%. Gjithashtu, reduktimi i stresit dhe marrja e vaksinës kundër gripit mund të zvogëlojnë rrezikun për infeksione deri në 60%.
