Një përballje e zjarrtë në Gewiss Stadium do të vendosë përballë Atalantën dhe Interin në një ndeshje vendimtare për fatet e kampionatit. Në qendër të vëmendjes është Mateo Retegui, golashënuesi më i mirë i Serie A, i cili dikur ishte pranë një transferimi te Interi.
Afër Interit në 2023
Retegui bëri emër në futbollin italian kur luante ende për Tigre. Ish-trajneri i Italisë, Roberto Mancini, shfrytëzoi shtetësinë e tij italiane dhe e thirri për herë të parë me “Azzurrët”, ku debutoi me gola kundër Anglisë dhe Maltës.
Këto paraqitje tërhoqën interesimin e Interit, me drejtorët sportivë Piero Ausilio dhe Dario Baccin që ndoqën nga afër ndeshjet e tij. Klubi zikaltër, duke ndjekur rekomandimet e legjendës Javier Zanetti dhe lidhjen me Facundo Colidion (atëherë i huazuar te Tigre), nisi bisedimet për transferimin e tij.
Megjithatë, një klauzolë që mbante Boca Juniors me 50% të të drejtave mbi lojtarin e ndërlikoi tratativat, dhe në fund Genoa fitoi garën për të në verën e 2023-s për 15 milionë euro. Në sezonin e tij të parë në Serie A, Retegui tregoi vetëm shkëndija të talentit të tij, duke shënuar 9 gola.
Pika e kthesës me Atalantën
Në fund të sezonit të tij të parë në Itali, Retegui pritej të qëndronte te Genoa, por dëmtimi i rëndë i Gianluca Scamacca ndryshoi planet e Atalantës. Klubi bergamask vendosi të investonte 25 milionë euro për sulmuesin, duke refuzuar interesimet e Juventusit, Fiorentinës dhe Romës, që nuk kishin fuqinë financiare për të bërë një lëvizje të tillë.
Interi e donte si zëvendësues të Lautaros
Interi nuk e kishte harruar kurrë Reteguin dhe e kishte parashikuar atë si një zëvendësues ideal për Lautaro Martinez, duke ndjekur të njëjtën rrugë që “Il Toro” bëri dikur pas Mauro Icardit.
Megjithatë, marrëveshja nuk u realizua. Kufizimet buxhetore detyruan Interin të merrte Mehdi Taremin si transferim të lirë, ndërsa dështimi për të larguar Joaquin Correan dhe Marko Arnautovic nuk i dha hapësirë klubit për lëvizje të tjera.
Retegui, Mbreti i golave me Atalantën
Sot, Retegui është duke kaluar një sezon të jashtëzakonshëm me Atalantën. Ai është golashënuesi më i mirë i Serie A me 22 gola në 26 ndeshje dhe ka shënuar edhe tre herë në Champions League.
Lëvizja e Atalantës për ta marrë është konfirmuar si një tjetër goditje brilante e klubit, por merita i takon edhe trajnerit Gian Piero Gasperini, i cili ka arritur të nxjerrë maksimumin nga sulmuesi i tij.
Për Interin dhe Simone Inzaghin, kjo sfidë do të jetë edhe një kujtesë e asaj që mund të kishin pasur në ekipin e tyre.
