Kapiteni i anijes së mallrave Solong, e cila më 10 mars u përplas me një cisternë amerikane të naftës në Detin e Veriut, është arrestuar me dyshimin për vrasje nga pakujdesia.
Anija me flamur portugez kishte në bord 14 anëtarë të ekuipazhit me kombësi ruse dhe filipinase në momentin e aksidentit, i cili ndodhi rreth 16 kilometra larg brigjeve britanike, teksa ajo ishte në rrugë nga Grangemouth drejt Roterdamit.
Autoritetet britanike kanë deklaruar se ende nuk është përcaktuar shkaku i përplasjes. Hetimet po zhvillohen nga Policia e Humberside, Dega e Hetimit të Aksidenteve Detare të Mbretërisë së Bashkuar, si dhe hetues nga SHBA dhe Portugalia.
Pas përplasjes, anijet u përfshinë nga flakët, duke detyruar dhjetëra persona t’i braktisin ato. Shërbimi i Rojës Bregdetare arriti të shpëtojë 36 persona pas dhënies së alarmit në orën 09:48 të mëngjesit të së hënës. Ndërkohë, shërbimet e urgjencës dhe autoambulancat u vendosën në gatishmëri në një port të afërt për të ofruar ndihmë të menjëhershme.
