“Jemi krenar” është fjalia që më së shumti është përdorur nga El Cholo Simeone në vitet e fundit, pas një cikli të gjatë në krye të stolit të Atletico Madrid ku nuk është se shpenzimet kanë qenë të vogla dhe gjithmonë në merkato Colchoneros kanë qenë aktiv madje duke shpenzuar edhe mbi 100 mln euro për një futbollist: rasti Joao Felix!
Por, ajo që trajneri argjentinasi ka bërë gjithmonë ka qenë të flasë për krenari dhe ankesa të ndryshme, duke mos analizuar atë që Atletico Madrid ka bërë në fushë: më së shumti anti-futboll. Qoftë edhe kur ka pasur teknikë, qoftë edhe kur ka pasur freski, qoftë edhe kur ka qenë në situata avantazhuese për të menaxhuar.
Në një moment historik ku Real Madrid dukej totalisht si ai mekanizmi i ngecur dhe pa vaj, në momentin kur skuadra e Ancelottit ndodhej në një cep dhe priste grushtin final, Atletico Madrid vendosi që të mos luante futboll por të prishte futbollin e kundërshtarit, një “refren” i parë dhe i stërparë.
Simeone kërkon ndihmën e publikut, ambjentit, por gjithmonë sepse në fushë duhet të kthehet në një arenë gladiatorësh. Në fakt, skema loje, ide taktike por edhe qoftë sulme jo “ushtarake” nuk bëhet fjalë të shihen. Dhe, frika për të mos pësuar është më e madhe se frika për të luajtur futboll.
Fakti është që ky Atletico Madrid gjithmonë duhet ta çojë gjithçka në pikat e fundit ku ndahet drama nga arritja. Dhe, dramat kanë qenë gjithmonë më të mëdha se sa fitoret…
