Jimmy Kimmel ka ironizuar Donald Trump për pretendimin e tij, gjatë fjalimit në Kongres, se qeveria amerikane shpenzoi 8 milionë dollarë për të bërë minjtë “transgjinorë”.
Trump bëri këtë pretendim krejtësisht të pavërtetë gjatë fjalimit të tij në Kongres të martën mbrëma (4 mars). Ai e përdori këtë fjalim për të theksuar disa iniciativa që ka ndërmarrë gjatë gjashtë javëve të para në detyrë.
Gjatë emisionit të tij, Kimmel vuri në dukje se deklarata e Trump-it për minjtë nuk ishte e vërtetë.
Gjatë monologut të hapjes, prezantuesi televiziv tha: “E dini, kur dëgjoni presidentin e Shteteve të Bashkuara të thotë se po shpenzojmë 8 milionë dollarë për operacione për ndërrimin e seksit te minjtë, mendoni: ‘Epo, jam i sigurt që ai po e ekzagjeron, por duhet të ketë diçka aty.‘ Rezulton se nuk ka. Nuk është e vërtetë.”
Kimmel shpjegoi: “Qeveria ka shpenzuar para për minj transgjenikë dhe jo transgjinorë, të cilët janë minj të modifikuar gjenetikisht që përdoren në testet laboratorike për të studiuar sëmundjet. Kjo nuk ka asnjë lidhje me të qenit transgjinor.”
Duke vazhduar, Kimmel pyeti: “Përveç fjalës, pjesës ‘trans’ të fjalës. Mendoni se ata e dinë këtë dhe thjesht e injorojnë, apo janë kaq budallenj sa nuk dinë si të bëjnë një kërkim në Google? Apo ndoshta mendojnë se ne jemi aq budallenj sa nuk dimë të kërkojmë në Google? Nuk e di.”
“Ata po i kthejnë Mickey-t në Minnie dhe Minnie-t në Mickey,” bëri shaka Kimmel. “Jo, në fakt, ata thjesht po përpiqen të gjejnë një kurë për demencën dhe sëmundjet e zemrës, për të cilat do të mendonit se Trump do të ishte pro, duke parë se të dyja po i afrohen shumë shpejt”, shtoi ai.
