Ka mbetur vetëm dy javë nga nisja e grumbullimit zyrtar të kombëtares për rrugëtimin e ri në kualifikueset e Kampionatit Botëror 2026. Lajme pozitive vijnë edhe nga lojtarët kuqezinj, të cilët po paraqiten mirë me klubet e tyre.
Jasir Asani i dha fitoren e parë skuadrës së Gwangju në sezonin e ri, që sapo ka nisur. Sulmuesi i kombëtares ishte i jashtëzakonshëm, pasi shënoi dy gola vendimtarë në fitoren 2-1 ndaj Anyang. Fillimisht, Asani barazoi rezultatin në minutën e 57-të, ndërsa vulosi fitoren me një gol spektakolar në fundin e lojës.
Në mesjavë, rrugën e rrjetës e gjeti edhe Nedim Bajrami. Mesfushori kuqezi shënoi në fitoren e Rangers në transfertë ndaj Kilmarnock me rezultatin 2-4. Bajrami realizoi golin e fundit të takimit, duke vulosur përfundimisht triumfin e Rangers.
Mirlind Daku ishte protagonist me një asist në ndeshjen Akhmat Grozny-Rubin Kazan. Sulmuesi i kombëtares shërbeu saktë për Shabanhaxhajn në minutën e 10-të, i cili shënoi për skuadrën e Rubin Kazanit. Megjithatë, ndeshja në fund u mbyll me fitoren e Akhmat Grozny 2-1, pasi vendasit shënuan dy herë dhe morën tri pikët.
Nga lojtarët e kombëtares, titullarë me skuadrat e tyre u aktivizuan Elhan Kastrati, Berat Gjimshiti, Arlind Ajeti, Enea Mihaj, Marash Kumbulla, Qazim Laçi, Feta Fetai, Adrion Pajaziti, Keidi Bare, Medon Berisha dhe Arbër Hoxha. Dhanë kontributin e tyre si zëvendësues Ivan Balliu, Taulant Seferi, Ernest Muçi dhe Myrto Uzuni.
