“Nuk erdha këtu për të luajtur keq, por dua të luaj mirë. Dua të bëj epokë dhe të shkruaj historinë e Real Madridit. Duhej të luaja me personalitet, koha e përshtatjes ka mbaruar dhe tani duhet të tregoj cilësitë e mia”.
Kurrë më parë, Kylian Mbappé nuk kishte dhënë një deklaratë kaq të qartë, të drejtpërdrejtë dhe mbresëlënëse që nga momenti kur zbarkoi në “planetin” Real Madrid, pas largimit nga Paris Saint-Germain. Këtë e tha në një intervistë për “CBS Sports Golazo”, duke lënë të kuptohet se është gati të bëjë histori me “Los Blancos”.
Tripleta e tij kundër Manchester City në ndeshjen e kthimit të “play off” të Ligës së Kampionëve, që përfundoi 3-1 në “Santiago Bernabéu”, jo vetëm eliminoi Guardiolën dhe ekipin e tij nga turneu prestigjioz, por gjithashtu i dha Mbappés çmimin “UEFA Man of the Match” dhe vulosi kualifikimin e Real Madridit në 1/8 finale. E veçanta? Francezi mori pjesë në golin e tij të 500-të në karrierë, një moment historik i arritur në moshën vetëm 26-vjeçare.
Sulmuesi francez, me dy golat e parë të shënuar, arriti një moment historik të rëndësishëm. Siç raportohet nga ekspertët e statistikave në Opta, në moshën 26 vjeç e 61 ditë, ish-lojtari i Paris Saint-Germain ka marrë pjesë në 500 gola midis klubeve dhe kombëtares, në të gjitha kompeticionet (358 gola dhe 142 asiste). Më pas, ai e çoi këtë numër në 501, duke u konfirmuar si një nga futbollistët e destinuar të bëjnë histori.
Pas një periudhe përshtatjeje në skemat e Carlo Ancelottit, ylli francez është në një formë të jashtëzakonshme. Këtë e konfirmoi edhe Jude Bellingham në një intervistë për “TNT Sports”: “E di që fillimi i tij nuk ishte i lehtë, iu desh kohë të përshtatej me këtë realitet të ri. Tani po rritet dhe përmirësohet çdo ditë e më shumë, është fantastike ta shohësh në këtë formë.
Është një ndjenjë e pabesueshme të luash me të. Kur zbresim në fushë, e dimë se mund t’i japim topin dhe ai do të bëjë diferencën. Detyra jonë, si mesfushorë, është ta ndihmojmë atë dhe sulmuesit e tjerë të jenë në pozitat më të mira për të vendosur ndeshjen.
Kur Kylian merr topin në zonat e tij të preferuara, bëhet i pandalshëm, si me të majtën, ashtu edhe me të djathtën. Sot (dje) shënoi gola të çdo lloji. Ajo që ka arritur në karrierën e tij është thjesht e pabesueshme”.
