Një orar i rregullt për t’u zgjuar, për të ngrënë dhe për të fjetur mund të lidhet me më pak dhimbje fizike dhe më pak simptoma depresive. Ky është përfundimi i një studimi të Universitetit të Misurit, i publikuar në revistën shkencore “Journal of Behavioral Medicine”.
Studiuesit analizuan të dhënat e 67 të rriturve në moshë të madhe dhe vunë re se ata që mbanin një rutinë më të qëndrueshme raportonin më pak dhimbje dhe simptoma depresive, edhe kur kishin probleme me gjumin. Sipas studiuesve, oraret e rregullta ndihmojnë në sinkronizimin e orës së brendshme biologjike, e cila ndikon te gjumi, humori dhe funksionimi i organizmit.
Ekspertët tërheqin vëmendjen edhe ndaj fenomenit të njohur si “jet lag social”: ndryshimi i madh i orarit të gjumit gjatë fundjavës krahasuar me ditët e javës. Megjithatë, studiuesit sqarojnë se kërkimi është kryer në një grup të vogël dhe nuk provon se rutina i shkakton drejtpërdrejt këto përmirësime. Ai sugjeron se qëndrueshmëria në zakonet e përditshme mund të jetë një element i rëndësishëm i mirëqenies.











