Një tragjedi e rëndë ka tronditur New York-un, ku tetë persona, mes tyre dy fëmijë, kanë humbur jetën si pasojë e shembjes së një godine trekatëshe në Brooklyn.
Ndërsa hetimet për zbardhjen e shkaqeve të ngjarjes vijojnë, janë publikuar pamje filmike nga momenti i shembjes së ndërtesës.
Në videon e parë, të regjistruar brenda një prej apartamenteve të godinës, shihet një djalë i vogël që vrapon drejt nënës së tij, pasi kuptojnë se diçka nuk shkon me ndërtesën. Sekonda më vonë, një mur shembet, ndërsa regjistrimi ndërpritet papritur.
Një tjetër video, e filmuar nga një kamera sigurie në një ndërtesë aty pranë, tregon renë e madhe të pluhurit që mbulon zonën pas shembjes, si dhe zhurmën e frikshme të shkaktuar nga katastrofa.
Sipas mediave amerikane, hetuesit po shqyrtojnë mundësinë që shembja të jetë shkaktuar nga punimet në një kantier ndërtimi pranë godinës.
Viktimat e tragjedisë
Mes tetë viktimave janë dy fëmijë, kushërinj të moshës 9 dhe 10 vjeç, një 26-vjeçar që priste të bëhej baba dhe një punëtor i ri ndërtimi.
“Isin miqtë dhe fqinjët tanë. Prindër dhe fëmijë, familje të reja që po ndërtonin jetën e tyre në qytetin tonë, si dhe emigrantë nga Meksika, Kolumbia, Ekuadori, Trinidadi dhe vende të tjera”, deklaroi kryebashkiaku Mamdani.
Sipas burimeve policore, fëmijët që humbën jetën janë 10-vjeçari Kevin Santiago Reyes Gonzalez dhe 9-vjeçarja Nicole Daniela Rodriguez.
Mes viktimave është edhe 26-vjeçari Jose Luis Caguana, emigrant nga Ekuadori, baba i një djali të vogël, ndërsa bashkëshortja e tij ishte shtatzënë. Ai kishte mbërritur në Shtetet e Bashkuara gjashtë vite më parë, bëri të ditur vëllai i tij, Carlos, për televizionin Univision.
Një tjetër viktimë është 26-vjeçari Edgar Santiago Sapon, i cili ishte i martuar dhe la pas një djalë gjashtëvjeçar.
Ndërkohë, 22-vjeçari Gabriel Sigüenza ishte një nga dy personat që ndërruan jetë në spital, pasi nuk arritën t’u mbijetonin plagëve të marra.
Mes viktimave të tjera janë edhe 23-vjeçari Mamadou Barry, me origjinë nga Guinea, si dhe 31-vjeçarët Juan Daniel Salvado Guzman dhe Diaye Mamadou, sipas burimeve të cituara nga mediat amerikane.
Kryebashkiaku Mamdani bëri gjithashtu të ditur se dy prej viktimave ishin punonjës në kantierin e ndërtimit pranë godinës, ku në momentin e shembjes po kryheshin punime gërmimi.
Hetimet vijojnë për të përcaktuar përgjegjësitë dhe shkaqet e sakta të kësaj tragjedie.
