Gara presidenciale amerikane e vitit 2028 ka nisur të diskutohet gjithnjë e më shumë, ndonëse asnjë kandidat kryesor nuk ka shpallur zyrtarisht kandidaturën. Sipas një sondazhi të CNN-it, të zhvilluar nga SSRS përpara zgjedhjeve të mesmandatit, 54% e amerikanëve kanë menduar të paktën deri diku për garën e ardhshme presidenciale, ndërsa 40% thonë se e presin me interes.
Në kampin republikan, emrat që përmenden më shpesh janë zëvendëspresidenti JD Vance dhe sekretari i Shtetit, Marco Rubio, të cilët përmenden përkatësisht nga 7% dhe 8% e të anketuarve. Kur u pyetën për kandidatë konkretë, 41% e republikanëve dhe të prirurve drejt Partisë Republikane thanë se do të ishin entuziastë për të mbështetur secilin prej tyre. Vance ka gjithashtu një potencial më të madh mbështetjeje: 77% thanë se të paktën do ta konsideronin votën për të, kundrejt 65% për Rubion.
Në kampin demokrat, emrat më të përmendur në mënyrë spontane janë guvernatori i Kalifornisë, Gavin Newsom, ish-zëvendëspresidentja Kamala Harris dhe ish-sekretari i Transportit, Pete Buttigieg. Kur u pyetën për kandidatë të veçantë, 27% e demokratëve dhe të pavarurve me prirje demokrate thanë se do të ishin entuziastë për Harris ose kongresisten Alexandria Ocasio-Cortez, ndërsa 26% për Buttigieg. Sondazhi tregon gjithashtu se një pjesë e madhe e votuesve ende nuk kanë krijuar një preferencë të qartë për pasuesin e Donald Trumpit, i cili nuk mund të kandidojë për një mandat të tretë.
