Argjentina po përgatitet të marrë një nga vendimet më simbolike pas largimit të Lionel Messit nga Kombëtarja: kush do të mbajë fanellën me numrin 10.
Sipas ESPN Argentina, stafi teknik i Lionel Scalonit ka ngushtuar zgjedhjen në dy emra: Lautaro Martínez dhe Nico Paz.
Kapiteni i Interit përfaqëson eksperiencën, golat dhe peshën në dhomat e zhveshjes, ndërsa Nico Paz shihet si një nga talentet më premtues të brezit të ri të Argjentinës.
22-vjeçari i Comos ka profilin klasik të një “numri 10”, falë teknikës, kreativitetit dhe aftësisë për të organizuar lojën, ndërsa Lautaro ofron lidership dhe eksperiencë në nivelet më të larta.
Vendimi përfundimtar pritet të merret drejt fundit të grumbullimit.
Fanella me numrin 10 ka një peshë të veçantë në historinë e Argjentinës, pasi është mbajtur nga dy prej figurave më të mëdha të futbollit botëror, Diego Maradona dhe Lionel Messi.
Tani pyetja është se kush do të jetë ai që do të marrë përsipër trashëgiminë e një numri që për Argjentinën është shumë më tepër se thjesht një fanellë.
