Dy persona kanë humbur jetën dhe 16 të tjerë janë plagosur pas një aksidenti të rëndë me autobus në lindje të Francës, pranë kufirit me Zvicrën. Ngjarja ndodhi të premten në mëngjes, në zonën e Lent, në departamentin Ain. Kryeministri francez Sébastien Lecornu konfirmoi se mes viktimave janë dy të mitur, ndërsa autoritetet bëjnë të ditur se tre prej të plagosurve ndodhen në gjendje kritike.
Për momentin, ka paqartësi mbi llojin e autobusit dhe numrin e personave që ndodheshin në të. Kryebashkiaku i Lent tha se bëhej fjalë për një autobus shkollor dhe se rreth 70 persona ishin prekur nga aksidenti, ndërsa prefektura lokale e përshkroi atë si autobus ndërqytetës dhe vlerësoi se numri ishte rreth 40. Pamjet nga vendngjarja tregojnë se njëra anë e autobusit është dëmtuar rëndë.
Në zonë janë angazhuar ekipet e emergjencës, policia dhe helikopterë për transportimin e të plagosurve. Autoritetet kanë aktivizuar planin e emergjencës dhe kanë nisur hetimet për të përcaktuar shkaqet e aksidentit. Ministri i Transportit, Philippe Tabarot, është nisur drejt vendngjarjes.
