Titulli botëror i Kimi Antonellit nuk është rezultat vetëm i një sezoni të jashtëzakonshëm. Pas suksesit të italianit qëndron një projekt nëntëvjeçar i Mercedesit dhe një investim prej më shumë se 10 milionë eurosh.
Skuadra gjermane besoi te Antonelli që kur ai ishte vetëm 11 vjeç, duke e mbështetur në çdo fazë të zhvillimit deri në debutimin në Formula 1 në vitin 2025, në moshën 18-vjeçare.
Toto Wolff, në një intervistë për Gazzetta dello Sport, zbuloi përmasat e investimit të bërë nga Mercedes.
“Njerëzit mendojnë se ky talent erdhi papritur. Pas tij ka shumë vite zhvillimi, sakrifica, punë me inxhinierët dhe mbi 10 milionë euro të shpenzuara për karrierën, aftësitë dhe karakterin e tij”, deklaroi drejtuesi i Mercedes.
Rrugëtimi nuk ishte aspak i lehtë. Në sezonin e tij debutues, Antonelli kaloi një periudhë me nëntë gara radhazi pa marrë pikë, duke shkaktuar kritika të forta edhe brenda paddock-ut.
“Vitin e kaluar kishte njerëz nga skuadra të tjera që thoshin se nuk meritonte të ishte te Mercedes. Disa thoshin madje se nuk duhej të ishte fare në Formula 1”, tregoi Wolff.
Presioni ndikoi edhe emocionalisht te italiani. Pas një tjetër gare të vështirë në Spa, Antonelli shpërtheu në lot.
Mercedes megjithatë vazhdoi të besonte tek ai dhe progresi erdhi gradualisht, deri në kurorëzimin si kampion bote në moshën vetëm 20-vjeçare.
“Ta shohim tani duke pilotuar në këtë mënyrë e bën gjithçka jashtëzakonisht të kënaqshme. Të shohësh se çfarë është në gjendje të bëjë dhe si punon me skuadrën, kjo është fitorja jonë e vërtetë”, përfundoi Wolff.
Mbi 10 milionë euro investim, nëntë vite punë dhe një bast i nisur që në karting. Sot, projekti i Mercedes është shpërblyer me titullin më të madh të Formula 1.
