Pas përfundimit të hetimeve, Prokuroria e Posaçme kundër Korrupsionit dhe Krimit të Organizuar ka depozituar në gjykatë dosjen “Partizani”. Gjykata e Posaçme njoftoi mbrëmjen e sotme se nesër në 09:00 do të hidhet në short çështja për përcaktimin e gjyqtarit paraprak.
“Mirëmbrëma të gjithëve! Nisur nga interesi qe ka pasur në media dhe në publik dosja “Partizani” ju njoftoj si më poshtë: Nesër, me datë 16.10.2024, ora 09:00 do të hidhet në short dosja penale, seancë paraprake (kërkesa për dërgimin e çështjes në gjyq, procedimi penal nr. 287, i vitit 2020), me kërkues Prokuroria e Posaçme kundër Korrupsionit dhe Krimit të Organizuar dhe të pandehur: Sali Berisha, Jamarbër Malltezi, Fatmir Bektashi, Xhimi Begeja, Andina Pustina, Studio Pustina sh.p.k, Shoqëria Homeplan sh.p.k dhe Shoqëria Kontakt sh.p.k.”, thuhet në njoftim.
Më 25 shtator Prokuroria e Posaçme Kundër Krimit dhe Korrupsionit i komunikoi përfundimin e hetimit ish-kryeministrit Sali Berisha dhe dhëndrit të tij, Jamarbër Malltezi.
Për ish-kryeministrin, firmosi avokatja Klodiana Gjyzari, ndërsa për Jamarbër Malltezin firmosi avokati Klodian Skënderi.
Prokuroria e Posaçme mbylli më 23 shtator hetimet për privatizimin e ish-klubit sportiv “Partizani”. Tashmë mbetet për t’u parë se si do të gjykohet kjo çështje, ku do të mësohen dhe masat e sigurisë që do të vendosen.
