Hansi Flick ka vlerësuar mënyrën se si Lamine Yamal ka reaguar pas zhgënjimit në Topin e Artë 2026, ku çmimi përfundoi në duart e Harry Kane.
Trajneri i Barcelonës pranoi se Kane e meritonte gjithashtu trofeun, por theksoi se Yamal ka treguar mentalitetin e duhur pas ceremonisë.
“Harry Kane e meritonte gjithashtu. Ju e dini çfarë mendoj për Lamine, ai është në nivelin për ta fituar atë trofe. Ajo që shoh tani është se ai është shumë i fokusuar. Kështu përgjigjen kampionët”, deklaroi Flick.
Gjermani shtoi se është krenar për mënyrën se si 19-vjeçari e ka përballuar situatën dhe se tashmë vëmendja duhet të rikthehet te objektivat e Barcelonës.
Flick foli edhe për situatën e Raphinhas, i cili është grumbulluar nga Brazili për miqësoret e nëntorit. Trajneri pranoi se do të dëshironte që minutat e tij të menaxhoheshin me kujdes, sidomos pas dëmtimit që pësoi gjatë grumbullimit të fundit.
“Do të isha i lumtur nëse minutat e tij do të menaxhoheshin pak. Nuk është ideale që të udhëtojë deri në Singapor, por kjo nuk varet nga unë”, tha ai.
Pas humbjeve ndaj PSG-së dhe Real Madridit, Flick kërkoi reagim të menjëhershëm ndaj Alavés.
“Rruga është shumë e gjatë. Asgjë nuk është e pakthyeshme. Humbëm ndaj Real Madridit dhe askujt nuk i pëlqen kjo, por duhet ta menaxhojmë. Nesër më e rëndësishmja janë tre pikët.”
Trajneri konfirmoi gjithashtu se Brian Fariñas është një alternativë reale për krahun e djathtë të mbrojtjes, ndërsa për Balden theksoi se duhet të rifitojë besimin në vetvete.
