Viking FK po jeton një nga periudhat më të bukura në historinë e klubit. Pasi riktheu titullin kampion në Norvegji pas 34 vitesh, skuadra nga Stavanger po shijon tashmë edhe skenën më të madhe europiane.
Pas barazimit spektakolar 3-3 ndaj Bayern Munich, ku Viking kryesonte 2-0 në pushim dhe gjeti golin e barazimit në minutat e fundit, kapiteni Zlatko Tripic nuk i fshehu emocionet.
“Do të mund të luaja edhe 90 minuta të tjera. Jam jashtëzakonisht krenar. Kam pritur 34 vite për këtë”, deklaroi ai.
Historia e Viking bëhet edhe më e veçantë për shkak të mënyrës se si drejtohet skuadra. Që prej vitit 2021, Morten Jensen dhe Bjarte Lunde Aarsheim janë bashkëtrajnerë të ekipit, një model i pazakontë në futbollin modern.
Të dy janë të lidhur ngushtë me klubin dhe e kanë përshkruar Viking si më shumë sesa një skuadër futbolli.
“Për ne, Viking është Barcelona. Duam që lojtarët ta kuptojnë se ky klub është më shumë se një ekip. Në kokën tonë, është skuadra më e mirë në botë”, ka thënë Aarsheim.
Rruga drejt këtij momenti nuk ka qenë aspak e lehtë. Në vitin 2017, Viking ra nga kategoria për herë të parë pas 31 vitesh, ndërsa vetëm një sezon më pas u rikthye menjëherë në elitë.
Klubi vendosi të ndryshonte filozofi, duke u fokusuar më shumë te lojtarët vendas, akademia dhe ndërtimi i një projekti afatgjatë.
Në vitin 2019 erdhi Kupa e Norvegjisë, ndërsa sezonin e kaluar Viking fitoi titullin kampion pas një gare dramatike me Bodo/Glimt, duke e siguruar trofeun vetëm në javën e fundit.
Tashmë skuadra po përjeton eksperiencën e parë në fazën kryesore të një kompeticioni europian që prej sezonit 2005/06.
Kalendari i Champions League i ka rezervuar Viking përballje me Bayern Munich, Aston Villa, Atletico Madrid dhe Napoli, një aventurë që drejtuesit e klubit e kanë përshkruar si “bufenë e plotë” të futbollit europian.
Në qendër të kësaj historie vazhdon të jetë Tripic. Kapiteni iu bashkua Viking pikërisht pas rënies nga kategoria në vitin 2018 dhe ka qenë një nga figurat kryesore në ringritjen e klubit.
Nga kategoria e dytë te titulli kampion dhe tashmë te netët e mëdha të Champions League, Viking ka ndërtuar një nga historitë më të veçanta të futbollit europian.
