Polemikat pas fitores 4-1 të Real Madridit ndaj Sevillas vazhdojnë, me episodin mes Arda Güler dhe Peque që ka shkaktuar reagime të forta te tifozët andaluzianë.
Në pjesën e parë, Peque dhe Güler u përplasën larg aksionit kryesor, ndërsa lojtarët e Sevillas pretenduan se turku e kishte goditur kundërshtarin me bërryl dhe duhej të ndëshkohej me karton të kuq.
VAR-i e kontrolloi situatën, por nuk e thirri arbitrin Mateo Busquets Ferrer për ta rishikuar episodin në monitor.
Sipas burimeve të Komitetit Teknik të Arbitrave, të cituara nga “Cadena SER”, arsyeja lidhet me mungesën e pamjeve të qarta.
“VAR-i ka të njëjtat kamera si transmetimi televiziv. Nëse nuk pati ndërhyrje, kjo ndodhi sepse nuk kishte prova të qarta dhe të padiskutueshme për sjellje të dhunshme”, ishte shpjegimi i CTA-së.
Pamjet e transmetuara ishin nga distanca dhe nuk lejonin të përcaktohej qartë as intensiteti i kontaktit dhe as zona ku Güler kishte prekur Peque.
Ish-arbitri Iturralde González kritikoi fort cilësinë e pamjeve të disponueshme.
“Nuk mund të shoh nëse e godet në fytyrë dhe as forcën e kontaktit. Pamjet janë shumë të dobëta. Nëse e godet në gjoks dhe nuk ka forcë të tepruar, është karton i verdhë. Nëse kontakti është në fytyrë, situata ndryshon.”
Episodi ndodhi kur rezultati ishte ende 0-0, ndërsa pak minuta më vonë Güler ishte protagonist në golin që zhbllokoi ndeshjen.
Sevilla mbeti e pakënaqur me vendimin, por sipas CTA-së, VAR-i nuk kishte prova të mjaftueshme vizuale për të rekomanduar një përjashtim.
