Qeveria franceze ka bërë një nga lëshimet e para ndaj nxënësve që prej ditësh protestojnë kundër kushteve në shkolla, duke premtuar angazhimin e 3 mijë mësuesve zëvendësues. Ministri i Arsimit, Édouard Geffray, njoftoi se mësuesit do të fillojnë të angazhohen në shkolla që përballen me mungesa të theksuara të personelit. Vendimi vjen pas grevave, bllokimeve të shkollave dhe përplasjeve mes protestuesve të rinj dhe policisë.
Sipas ministrit, 114 shkolla të mesme ndodhen në një situatë veçanërisht kritike për shkak të mungesës së mësuesve, ndërsa rreth 400 të tjera përballen me vështirësi në plotësimin e vendeve të punës. Protestuesit kërkojnë përmirësimin e kushteve të mësimit, më shumë vende në universitete dhe ndryshime në sistemin e pranimit në arsimin e lartë.
Mobilizimi i së enjtes, më 8 tetor, përfshiu dhjetëra mijëra persona në mbarë Francën. Shifrat ndryshojnë sipas burimeve: sindikata CGT raportoi më shumë se 130 mijë pjesëmarrës, ndërsa Ministria e Brendshme vlerësoi numrin në 71 500. Autoritetet njoftuan gjithashtu për qindra arrestime dhe dhjetëra efektivë policie të plagosur. Sindikatat e nxënësve dhe të arsimit kanë thirrur një tjetër ditë protestash për 13 tetor.
