Roberto Mancini ka kërkuar përqendrim maksimal nga Italia përpara sfidës ndaj Turqisë, duke pranuar se ngarkesa e madhe e ndeshjeve ka ndikuar te gjendja fizike e lojtarëve.
Azzurrët do të luajnë ndeshjen e katërt brenda vetëm 11 ditësh, ndërsa Raspadori, Zaniolo dhe Kean janë detyruar të largohen nga grumbullimi për shkak të problemeve fizike.
“Është një format shumë i lodhshëm, sidomos për lojtarët. Ka futbollistë që kanë luajtur titullarë në tri ndeshje radhazi, si Pio Esposito dhe Tonali. Mendoj se mund të bëhet më mirë”, u shpreh Mancini.
Trajneri italian paralajmëroi gjithashtu skuadrën që të mos mashtrohet nga momenti i vështirë i Turqisë dhe mungesat e kundërshtarit.
“Nuk duhet të mendojmë se do të jetë një ndeshje e lehtë. Turqia ka shumë lojtarë cilësorë. U mungojnë disa emra të rëndësishëm, por ata që do të luajnë do të duan të tregojnë veten. Nuk mund ta nënvlerësojmë këtë ndeshje.”
Mancini foli edhe për të rinjtë Vergara dhe Inácio, duke theksuar se të dy kanë cilësi, por duhet të zhvillohen gradualisht. Për Vergarën, tekniku shpreson që në të ardhmen të bëhet një pikë e rëndësishme në krahun e djathtë të Italisë.
Në fund, trajneri u pyet edhe për situatën në FIGC dhe ndryshimet e mundshme në drejtimin e federatës.
“Nuk e di çfarë mund të ndodhë nesër. Sot duhet të mendojmë për ndeshjen dhe më pas shpresojmë që gjithçka të shkojë në drejtimin e duhur. Jam i bindur se do të ketë stabilitet”, përfundoi Mancini.
