Policia ka ndaluar një 15-vjeçar në qytetin e Shkodrës lidhur me ngjarjen e rëndë ku pas një sherri në zonën e Fermentimit në lagjen ‘Skenderbeg’, mbeti i plagosur Emiliano Gjoni edhe ky 15-vjeç, i cili fatkeqësisht humbi jetën në spital.
Adoleshenti i ndaluar mendohet të jetë autori i këtij krimi, motivet e të cilit janë ende të paqarta. Sipas burimeve nga policia, gjatë këqyrjes së vendit të ngjarjes janë gjetur dhe sekuestruan në cilësinë e provës materiale mjetin prerës (thikë) që dyshohet se është përdorur gjatë konfliktit mes adoleshentëve.
Autori i dyshuar që është ndaluar nga policia rezulton të ketë një plagë të lëhtë me thikë në pjesën e supit, por pa problem për jetën. Tashmë i ndaluari do të merret në pyetje në prani të një psikologu dhe familjarëve të tij, për të zbuluar rrethanat dhe shkaqet e ngjarjes që tronditi vendin.
Kujtojmë se Emiliano që ndërroi jetë u gjet në rrugë i plagosur nga kalimtarë të rastësishëm dhe më pas u dërgua në spital, ku nuk mundi t’i mbijetojë lëndimeve që kishte marrë.
