Kuvendi i Shqipërisë zhvillon sot Konferencën Ndërparlamentare me temë “Agjenda strategjike për zgjerimin e BE-së dhe anëtarësimin e Shqipërisë”, e cila u çel nga kryeparlamentari Niko Peleshi.
Në fjalën e tij, Peleshi theksoi mbështetjen për integrimin europian dhe nevojën për të vijuar punën për përmbushjen e angazhimeve.
Ai tha se objektivi i Shqipërisë është mbyllja e negociatave deri në vitin 2027 dhe anëtarësimi në Bashkimin Europian deri në vitin 2030. Peleshi vuri gjithashtu në pah rolin e Shqipërisë si vend anëtar i NATO-s dhe si faktor stabilizues në rajon.
“Kjo konferencë kurorëzon një muaj të vrullshëm europian në Shqipëri. Thelluam gjithashtu dialogun me ambasadorët e tetë vendeve të Bashkimit Europian. Kudo kemi marrë një mbështetje inkurajuese. Integrimi i Shqipërisë në BE ka siguruar një mbështetje të madhe, por duhet që të punojmë edhe më shumë.
Zgjerimi nuk do të fitohet vetëm në sallat e negociatave të BE-së, por në tryezat e familjeve europiane. Ndërtimi i urave të qytetarëve dhe lidhja e komuniteteve janë objektivat kyçe të integrimit në BE. Në vitin 1941 Europa ishte pushtuar nga nazizmi. Europa e lirë u ëndërrua edhe nga shqiptarët, ku kufijtë nuk do të ishin më vija fronti. Ne shqiptarët e kuptojmë me zemër këtë histori, sepse edhe ne përgatitëm një gjysmë shekulli ishim një ishull në mes të Europës.
Kur ai izolim u shemb, studentët nuk dolën me një program politik, por me një thirrje të vetme: ‘E duam Shqipërinë si gjithë Europa’, ky ka qenë manifestimi ynë. Objektivi ynë është i qartë, integrimi në BE. Mbylljen e negociatave deri në 2027 dhe integrimi deri në 2030. Ky është ushqimi ynë nga ADN-ja. Këtë përkushtim e kemi dëshmuar me prona, si vend anëtar i NATO-s. Shqipëria është partnere e përkushtuar e NATO-s dhe SHBA-së, shërben si faktor stabilizues në rajon”, tha Peleshi.
